Fitt 1

1 Manega uuâron, | the sia iro môd gespôn,
2 ................, | that sia bigunnun uuord godes,
3 reckean that girûni, | that thie rîceo Crist
4 undar mancunnea | mâriða gifrumida
5 mid uuordun endi mid uuercun. | That uuolda thô uuîsara filo
6 liudo barno lob=on, | lêra Cristes,
7 hêlag uuord godas, | endi mid iro handon scrîb=an
8 berehtlîco an buok, | huô sia is gibodscip scoldin
9 frummian, firiho barn. | Than uuârun thoh sia fiori te thiu
10 under thera menigo, | thia habdon maht godes,
11 helpa fan himila, | hêlagna gêst,
12 craft fan Criste, -- | sia uurðun gicorana te thio,
13 that sie than êuangelium | ênan scoldun
14 an buok scrîb=an | endi sô manag gibod godes,
15 hêlag himilisc uuord: | sia ne muosta heliðo than mêr,
16 firiho barno frummian, | neuan that sia fiori te thio
17 thuru craft godas | gecorana uurðun,
18 Matheus endi Marcus, -- | sô uuârun thia man hêtana --
19 Lucas endi Iohannes; | sia uuârun gode lieb=a,
20 uuirðiga ti them giuuirkie. | Habda im uualdand god,
21 them heliðon an iro hertan | hêlagna gêst
22 fasto bifolhan | endi ferahtan hugi,
23 sô manag uuîslîk uuord | endi giuuit mikil,
24 that sea scoldin ahebbean | hêlagaro stemnun
25 godspell that guoda, | that ni hab=it ênigan gigadon huergin,
26 thiu uuord an thesaro uueroldi, | that io uualdand mêr,
27 drohtin diurie | eftho derb=i thing,
28 firinuuerc fellie | eftho fîundo nîð,
29 strîd uuid=erstande --, | huand hie habda starkan hugi,
30 mildean endi guodan, thie | thes mêster uuas,
31 aðalordfrumo | alomahtig.
32 That scoldun sea fiori thuo | fingron scrîb=an,
33 settian endi singan | endi seggean forð,
34 that sea fan Cristes | crafte them mikilon
35 gisâhun endi gihôrdun, | thes hie selb=o gisprac,
36 giuuîsda endi giuuarahta, | uundarlîcas filo,
37 sô manag mid mannon | mahtig drohtin,
38 all so hie it fan them anginne | thuru is ênes craht,
39 uualdand gisprak, | thuo hie êrist thesa uuerold giscuop
40 endi thuo all bifieng | mid ênu uuordo,
41 himil endi erða | endi al that sea bihlidan êgun
42 giuuarahtes endi giuuahsanes: | that uuarð thuo all mid uuordon godas
43 fasto bifangan, | endi gifrumid after thiu,
44 huilic than liudscepi | landes scoldi
45 uuîdost giuualdan, | eftho huar thiu uueroldaldar
46 endon scoldin. | Ên uuas iro thuo noh than
47 firiho barnun biforan, | endi thiu fîb=i uuârun agangan:
48 scolda thuo that sehsta | sâliglîco
49 cuman thuru craft godes | endi Cristas giburd,
50 hêlandero bestan, | hêlagas gêstes,
51 an thesan middilgard | managon te helpun,
52 firio barnon ti frumon | uuið fîundo nîð,
53 uuið dernero duualm. | Than habda thuo drohtin god
54 Rômanoliudeon farliuuan | rîkeo mêsta,
55 habda them heriscipie | herta gisterkid,
56 that sia habdon bithuungana | thiedo gihuilica,
57 habdun fan Rûmuburg | rîki giuunnan
58 helmgitrôsteon, | sâton iro heritogon
59 an lando gihuem, | habdun liudeo giuuald,
60 allon elitheodon. | Erodes uuas
61 an Hierusalem | ob=er that Iudeono folc
62 gicoran te kuninge, | sô ina thie kêser tharod,
63 fon Rûmuburg | rîki thiodan
64 satta undar that gisîði. | Hie ni uuas thoh mid sibbeon bilang
65 ab=aron Israheles, | eðiligiburdi,
66 cuman fon iro cnuosle, | neuan that hie thuru thes kêsures thanc
67 fan Rûmuburg | rîki habda,
68 that im uuârun sô gihôriga | hildiscalcos,
69 ab=aron Israheles | elleanruob=a:
70 suîðo unuuanda uuini, | than lang hie giuuald êhta,
71 Erodes thes rîkeas | endi râdburdeon held
72 Iudeo liudi. | Than uuas thar ên gigamalod mann,
73 that uuas fruod gomo, | habda ferehtan hugi,
74 uuas fan them liudeon | Levias cunnes,
75 Iacobas suneas, | guodero thiedo:
76 Zacharias uuas hie hêtan. | That uuas sô sâlig man,
77 huand hie simblon gerno | gode theonoda,
78 uuarahta after is uuilleon; | deda is uuîf sô self
79 -- uuas iru gialdrod idis: | ni muosta im erb=iuuard
80 an iro iuguðhêdi | gib=iðig uuerðan --
81 libdun im farûter laster, | uuaruhtun lof goda,
82 uuârun sô gihôriga | heb=ancuninge,
83 diuridon ûsan drohtin: | ni uueldun derb=eas uuiht
84 under mancunnie, | mênes gifrummean,
85 ne saca ne sundea. | Uuas im thoh an sorgun hugi,
86 that sie erb=iuuard | êgan ni môstun,
87 ac uuârun im barno lôs. | Than scolda he gibod godes
88 thar an Hierusalem, | sô oft sô is gigengi gistôd,
89 that ina torhtlîco | tîdi gimanodun,
90 sô scolda he at them uuîha | uualdandes geld
91 hêlag bihuuerb=an, | heb=ancuninges,
92 godes iungarskepi: | gern uuas he suîðo,
93 that he it thurh ferhtan hugi | frummean môsti.
[Fitt 2] [Fitt index]