[Back to Fitt 23]

Fitt 24

1994 Geuuêt imu thô umbi threa naht aftar thiu | thesoro thiodo drohtin
1995 an Galileo land, | thar he te ênum gômun uuarð,
1996 gebedan that barn godes: | thar scolda man êna brûd geb=an,
1997 munalîca magað. | Thar Maria uuas
1998 mid iro suni selb=o, | sâlig thiorna,
1999 mahtiges môder. | Managoro drohtin
2000 geng imu thô mid is iungoron, | godes êgan barn,
2001 an that hôha hûs, | thar the heri dranc,
2002 thea Iudeon an themu gastseli: | he im ôc at them gômun uuas,
2003 giac hi thar gecûðde, that hi habda craft godes,
2004 helpa fan himilfader, | hêlagna gêst,
2005 uualdandes uuîsdôm. | Uuerod blîðode,
2006 uuârun thar an luston | liudi atsamne,
2007 gumon gladmôdie. | Gengun ambahtman,
2008 skenkeon mid scâlun, | drôgun skîriane uuîn
2009 mid orcun endi mid alofatun; | uuas thar erlo drôm
2010 fagar an flettea, | thô thar folc undar im
2011 an them benkeon sô bezt | blîd=sea afhôb=un,
2012 uuârun thar an uunneun. | Thô im thes uuînes brast,
2013 them liudiun thes lîðes: | is ni uuas farlêb=id uuiht
2014 huergin an themu hûse, | that for thene heri forð
2015 skenkeon drôgin, | ac thiu scapu uuârun
2016 lîðes alârid. | Thô ni uuas lang te thiu,
2017 that it sân antfunda | frîo scôniosta,
2018 Cristes môder: | geng uuið iro kind sprecan,
2019 uuið iro sunu selb=on, | sagda im mid uuordun,
2020 that thea uuerdos thô mêr | uuînes ne habdun
2021 them gestiun te gômun. | Siu thô gerno bad,
2022 that is the hêlogo Crist | helpa geriedi
2023 themu uuerode te uuilleon. | Thô habda eft is uuord garu
2024 mahtig barn godes | endi uuið is môder sprac:
2025 `huat ist mi endi thi', quað he, | `umbi thesoro manno lið,
2026 umbi theses uuerodes uuîn? | Te huî sprikis thu thes, uuîf, sô filu,
2027 manos mi far thesoro menigi? | Ne sint mîna noh
2028 tîdi cumana.' | Than thoh gitrûoda siu uuel
2029 an iro hugiskeftiun, | hêlag thiorne,
2030 that is aftar them uuordun | uualdandes barn,
2031 hêleandoro bezt | helpan uueldi.
2032 Hêt thô thea ambahtman | idiso scôniost,
2033 skenkeon endi scapuuardos, | thea thar scoldun thero scolu thionon,
2034 that sie thes ne uuord ne uuerc | uuiht ne farlêtin,
2035 thes sie the hêlogo Crist | hêtan uueldi
2036 lêstean far them liudiun. | Lârea stôdun thar
2037 stênfatu sehsi. | Thô sô stillo gebôd
2038 mahtig barn godes, | sô it thar manno filu
2039 ne uuissa te uuârun, | huô he it mid is uuordu gesprac;
2040 he hêt thea skenkeon thô | skîreas uuatares
2041 thiu fatu fullien, | endi hi thar mid is fingrun thô,
2042 segnade selb=o | sînun handun,
2043 uuarhte it te uuîne | endi hêt is an ên uuêgi hlad=en,
2044 skeppien mid ênoro scâlon, | endi thô te them skenkeon sprac,
2045 hêt is thero gesteo, | the at them gômun uuas
2046 themu hêroston | an hand geb=an,
2047 ful mid folmun, | themu the thes folkes thar
2048 geuueld aftar themu uuerde. | Reht sô hi thes uuînes gedranc,
2049 sô ni mahte he bemîðan, | ne hi far theru menigi sprac
2050 te themu brûdigumon, | quað that simbla that bezte lîð
2051 alloro erlo gehuilic | êrist scoldi
2052 geb=an at is gômun: | `undar thiu uuirðid thero gumono hugi
2053 auuekid mid uuînu, | that sie uuel blîðod,
2054 druncan drômead. | Than mag man thar dragan aftar thiu
2055 lîhtlîcora lîð: | sô ist thesoro liudeo thau.
2056 Than hab=as thu nu uunderlîco | uuerdskepi thînan
2057 gemarcod far thesoro menigi: | hêtis far thit manno folc
2058 alles thînes uuînes | that uuirsiste
2059 thîne ambahtman | êrist brengean,
2060 geb=an at thînun gômun. | Nu sint thîna gesti sade,
2061 sint thîne druhtingos | druncane suîðo,
2062 is thit folc frômôd: | nu hêtis thu hîr forð dragan
2063 alloro lîðo lofsamost, | thero the ic eo an thesumu liohte gesah
2064 huergin hebbean. | Mid thius scoldis thu ûs hindag êr
2065 geb=on endi gômean: | than it alloro gumono gehuilic
2066 gethigedi te thanke.' | Thô uuarð thar thegan manag
2067 geuuar aftar them uuordun, | sîðor sie thes uuînes gedruncun,
2068 that thar the hêlogo Crist | an themu hûse innan
2069 têcan uuarhte: | trûodun sie sîðor
2070 thiu mêr an is mundburd, | that hi habdi maht godes,
2071 geuuald an thesoro uueroldi. | Thô uuarð that sô uuîdo cûð
2072 ob=ar Galileo land | Iudeo liudiun,
2073 huô thar selb=o gededa | sunu drohtines
2074 uuater te uuîne: | that uuarð thar uundro êrist,
2075 thero the hi thar an Galilea | Iudeo liudeon,
2076 têcno getôgdi. | Ne mag that getellean man,
2077 geseggean te sôðan, | huat thar sîðor uuarð
2078 uundres undar themu uuerode, | thar uualdand Crist
2079 an godes namon | Iudeo liudeon
2080 allan langan dag | lêra sagde,
2081 gihêt im heb=enrîki | endi helleo gethuing
2082 uueride mid uuordun, | hêt sie uuara godes,
2083 sinlîf sôkean: | thar is seolono lioht,
2084 drôm drohtines | endi dagskîmon,
2085 gôdlîcnissea godes; | thar gêst manag
2086 uunod an uuillean, | the hîr uuel thenkid,
2087 that he hîr bihalde | heb=encuninges gebod.
[Fitt 25] [Fitt index]