[Back to Fitt 32]

Fitt 33

2698b Than fôr imu an uueg ôðran
2699 Iohannes mid is iungarun, | godes ambahtman,
2700 lêrde thea liudi | langsamane râd,
2701 hêt that sie frume fremidin, | firina farlêtin,
2702 mên endi morðuuerk. | He uuas thar managumu liof
2703 gôdaro gumono. | He sôhte imu thô thene Iudeono cuning,
2704 thene heritogon at hûs, | the hêten ûuas
2705 Erodes aftar is eldiron, | ob=armôdig man:
2706 bûide imu be theru brûdi, | thiu êr sînes brôd=er uuas,
2707 idis an êhti, | anttat he ellior skôc,
2708 uuerold uueslode. | Thô imu that uuîf ginam
2709 the cuning te quenun; | êr uuârun iro kind ôdan,
2710 barn be is brôd=er. | Thô bigan imu thea brûd lahan
2711 Iohannes the gôdo, | quað that it gode uuâri,
2712 uualdande uuiðermôd, | that it ênig uuero frumidi,
2713 that brôd=er brûd | an is bed nâmi,
2714 hebbie sie imu te hîuun. | `Ef thu mi hôrien uuili,
2715 gilôb=ien mînun lêrun, | ni scalt thu sie leng êgan,
2716 ac mîð ire an thînumu môde: | ni hab=a thar sulica minnea tô,
2717 ni sundeo thi te suîðo.' | Thô uuarð an sorgun hugi
2718 thes uuîb=es aftar them uuordun; | andrêd that he thene uueroldcuning
2719 sprâcono gespôni | endi spâhun uuordun,
2720 that he sie farlêti. | Began siu imu thô lêðes filu
2721 râden an rûnon, | endi ine rinkos hêt,
2722 unsundigane | erlos fâhan
2723 endi ine an ênumu karkerea | klûstarbendiun,
2724 liðocospun bilûcan: | be them liudiun ne gidorstun
2725 ine ferahu bilôsien, | huand sie uuârun imu friund alle,
2726 uuissun ine sô gôden | endi gode uuerðen,
2727 habdun ina for uuârsagon, | sô sia uuela mahtun.
2728 Thô uurðun an themu gêrtale | Iudeo cuninges
2729 tîdi cumana, | sô thar gitald habdun
2730 frôde folcuueros, | thô he gifôdid uuas,
2731 an lioht cuman. | Sô uuas thero liudio thau,
2732 that that erlo gehuilic | ôb=ean scolde,
2733 Iudeono mid gômun. | Thô uuarð thar an thene gastseli
2734 megincraft mikil | manno gesamnod,
2735 heritogono an that hûs, | thar iro hêrro uuas
2736 an is kuningstôle. | Quâmun managa
2737 Iudeon an thene gastseli; | uuarð im thar gladmôd hugi,
2738 blîði an iro breostun: | gisâhun iro bâggeb=on
2739 uuesen an uunneon. | Drôg man uuîn an flet
2740 skîri mid scâlun, | skenkeon huurb=un,
2741 gengun mid goldfatun: | gaman uuas thar inne
2742 hlûd an thero hallu, | heliðos drunkun.
2743 Uuas thes an lustun | landes hirdi,
2744 huat he themu uuerode mêst | te uunniun gifremidi.
2745 Hêt he thô gangen forð | gêla thiornun,
2746 is brôder barn, | thar he an is benki sat
2747 uuînu giuulenkid, | endi thô te themu uuîbe sprac;
2748 grôtte sie fora themu gumskepie | endi gerno bad,
2749 that siu thar fora them gastiun | gaman afhôb=i
2750 fagar an flettie: | `lât thit folc sehan,
2751 huô thu gelînod hab=as | liudio menegi
2752 te blîðseanne an benkiun; | ef thu mi thera bede tugiðos,
2753 mîn uuord for thesumu uuerode, | than uuilliu ik it hêr te uuârun gequeðen,
2754 liahto fora thesun liudiun | endi ôk gilêstien sô,
2755 that ik thi than aftar thiu | êron uuilliu,
2756 sô hues sô thu mi bidis | for thesun mînun bâguuiniun:
2757 thoh thu mi thesaro heridômo | halb=aro fergos,
2758 rîkeas mînes, | thoh gidôn ik, that it ênig rinko ni mag
2759 uuordun giuuendien, | endi it scal giuuerðen sô.'
2760 Thô uuarð thera magað aftar thiu | môd gihuorb=en,
2761 hugi aftar iro hêrron, | that siu an themu hûse innen,
2762 an themu gastseli | gamen up ahuof,
2763 al sô thero liudio | landuuîse gidrôg,
2764 thero thiodo thau. | Thiu thiorne spilode
2765 hrôr aftar themu hûse: | hugi uuas an lustun,
2766 managaro môdseb=o. | Thô thiu magað habda
2767 githionod te thanke | thiodcuninge
2768 endi allumu themu erlskepie, | the thar inne uuas
2769 gôdaro gumono, | siu uuelde thô ira geb=a êgan,
2770 thiu magað for theru menegi: | geng thô uuið iro môdar sprekan
2771 endi frâgode sie | firiuuitlîco,
2772 hues siu thene burges uuard | biddien scoldi.
2773 Thô uuîsde siu aftar iro uuilleon, | hêt that siu uuihtes than êr
2774 ni gerodi for themu gumskepie, | biûtan that man iru Iohannes
2775 an theru hallu innan | hôb=id gâb=i
2776 alôsid af is lîchamon. | That uuas allun them liudiun harm,
2777 them mannun an iro môde, | thô sie that gihôrdun thea magað sprekan;
2778 sô uuas it ôk themu kuninge: | he ni mahte is quidi liagan,
2779 is uuord uuendien: | hêt thô is uuêpanberand
2780 gangen fan themu gastseli | endi hêt thene godes man
2781 lîb=u bilôsien. | Thô ni uuas lang te thiu,
2782 that man an thea halla | hôb=id brâhte
2783 thes thiodgumon, | endi it thar theru thiornun fargaf,
2784 magað for theru menegi: | siu drôg it theru môder forð.
2785 Thô uuas êndago | allaro manno
2786 thes uuîsoston, | thero the gio an thesa uuerold quâmi,
2787 thero the quene ênig | kind gibâri,
2788 idis fan erle, | lêt man simla then ênon biforan,
2789 the thiu thiorne gidrôg, | the gio thegnes ni uuarð
2790 uuîs an iro uueroldi, | biûtan sô ine uualdand god
2791 fan heb=enuuange | hêlages gêstes
2792 gimarcode mahtig: | the ni habde ênigan gimacon huergin
2793 êr nec aftar. | Erlos huurb=un,
2794 gumon umbi Iohannen, | is iungaron managa,
2795 sâlig gesîði, | endi ine an sande bigrôb=un,
2796 leob=es lîchamon: | uuissun that he lioht godes,
2797 diurlîcan drôm | mid is drohtine samad,
2798 upôdas hêm | êgan môste,
2799a sâlig sôkean. |
[Fitt 34] [Fitt index]