[Back to Fitt 37]

Fitt 38

3122b Thô imu thar te bedu gihnêg,
3123 thô uuarð imu thar uppe | ôðarlîcora
3124 uuliti endi giuuâdi: | uurðun imu is uuangun liohte,
3125 blîcandi sô thiu berhte sunne: | sô skên that barn godes,
3126 liuhte is lîchamo: | liomon stôdun
3127 uuânamo fan themu uualdandes barne; | uuarð is geuuâdi sô huît
3128 sô snêu te sehanne. | Thô uuarð thar seldlîc thing
3129 giôgid aftar thiu: | Elias endi Moyses
3130 quâmun thar te Criste | uuið sô craftagne
3131 uuordun uuehslean. | Thar uuarð sô uunsam sprâka,
3132 sô gôd uuord undar gumun, | thar the godes sunu
3133 uuið thea mârean man | mahlien uuelde,
3134 sô blîði uuarð uppan themu berge: | skên that berhte lioht,
3135 uuas thar gard gôdlic | endi grôni uuang,
3136 paradise gelîc. | Petrus thô gimahalde,
3137 helið hardmôdig | endi te is hêrron sprac,
3138 grôtte thene godes sunu: | `gôd is it hêr te uuesanne,
3139 ef thu it gikiosan uuili, | Crist alouualdo,
3140 that man thi hêr an thesaru hôhe | ên hûs geuuirkea,
3141 mârlîco gemaco | endi Moysese ôðer
3142 endi Eliase thriddea: | thit is ôdas hêm,
3143 uuelono uunsamost.' | Reht sô he thô that uuord gesprak,
3144 sô tilêt thiu luft an tuê: | lioht uuolcan skên,
3145 glîtandi glîmo, | endi thea gôdun man
3146 uulitiscôni beuuarp. | Thô fan themu uuolcne quam
3147 hêlag stemne godes, | endi them heliðun thar
3148 selb=o sagde, | that that is sunu uuâri,
3149 libbiendero liob=ost: | `an themu mi lîcod uuel
3150 an mînun hugiskeftiun. | Themu gi hôrien sculun,
3151 fulgangad imu gerno.' | Thô ni mahtun thea iungaron Cristes
3152 thes uuolcnes uuliti | endi uuord godes,
3153 thea is mikilon maht | thea man antstanden,
3154 ac sie bifellun thô forðuuardes: | ferhes ni uuândun,
3155 lengiron lîb=es. | Thô geng im tô the landes uuard,
3156 behrên sie mid is handun | hêleandero bezt,
3157 hêt that sie im ni andrêdin: | `ni scal iu hêr derien eouuiht,
3158 thes gi hêr seldlîkes | gisehen habbiad,
3159 mêriaro thingo.' | Thô eft them mannun uuarð
3160 hugi at iro herton | endi gihêlid môd,
3161 gibade an iro breostun: | gisâhun that barn godes
3162 ênna standen, | uuas that oðer thô,
3163 behliden himiles lioht. | Thô giuuêt imu the hêlago Crist
3164 fan themu berge niðer; | gibôd aftar thiu
3165 iungarun sînun, | that sie ob=ar Iudeono folc
3166 ni sagdin thea gisioni: | `er than ik selb=o hêr
3167 suîðo diurlîco | fan dôd=e astande,
3168 arîse fan theru restu: | sîðor mugun gi it rekkien forð,
3169 marien ob=ar middilgard | managun thiodun
3170a uuîdo aftar thesaru uueroldi.' |
[Fitt 39] [Fitt index]