[Back to Fitt 44]

Fitt 45

3671 Thô nahide | neriendo Crist,
3672 the gôdo te Hierusalem. | Quam imu thar tegegnes filu
3673 uuerodes an uuilleon | uuel huggendies,
3674 antfengun ina fagaro | endi imu biforen streidun
3675 thene uueg mid iro giuuâdiun | endi mid uurtiun sô same,
3676 mid berhtun blômun | endi mid bômo tôgun,
3677 that feld mid fagaron palmun, | al sô is fard geburide,
3678 that the godes sunu | gangan uuelde
3679 te theru mârean burg. | Huarf ina megin umbi
3680 liudio an lustun, | endi lofsang ahôf
3681 that uuerod an uuilleon: | sagdun uualdande thank,
3682 thes thar selb=o quam | sunu Dauides
3683 uuîson thes uuerodes. | Thô gesah uualdand Krist
3684 the gôdo te Hierusalem, | gumono bezta,
3685 blîcan thene burges uual | endi bû Iudeono,
3686 hôha hornseli | endi ôk that hûs godes,
3687 allaro uuîho uunsamost. | Thô uuel imu an innen
3688 hugi uuið is herte: | thô ni mahte that hêlage barn
3689 uuôpu auuîsien, | sprak thô uuordo filu
3690 hriuuiglîco -- | uuas imu is hugi sêreg - | -:
3691 `uuê uuarð thi, Hierusalem,' quað he, `thes thu te uuârun ni uuêst
3692 thea uurdegiskefti, | the thi noh giuuerðen sculun,
3693 huô thu noh uuirðis behabd | heries craftu
3694 endi thi bisittiad | slîðmôde man,
3695 fîund mid folcun. | Than ni hab=as thu friðu huergin,
3696 mundburd mid malmun: | lêdiad thi hêr manage tô
3697 ordos endi eggia, | orlegas uuord,
3698 farfioth thîn folcskepi | fiures liomon,
3699 these uuîki auuôstiad, | uuallos hôha
3700 felliad te foldun: | ni afstâd is felis nigiean,
3701 stên ob=ar ôðrumu, | ak uuerðad thesa stedi uuôstia
3702 umbi Hierusalem | Iudeo liudeo,
3703 huand sie ni antkenniad, | that im kumana sind
3704 iro tîdi tôuuardes, | ac sie habbiad im tuîflien hugi,
3705 ni uuitun that iro uuîsad | uualdandes craft.'
3706 Giuuêt imu thô mid theru menegi | manno drohtin
3707 an thea berhton burg. | Sô thô that barn godes
3708 innan Hierusalem | mid thiu gumono folcu,
3709 sêg mid thiu gesîðu, | thô uuarð thar allaro sango mêst,
3710 hlûd stemnie afhab=en | hêlagun uuordun,
3711 lob=odun thene landes uuard | liudio menegi,
3712 barno that bezte; | thiu burg uuarð an hrôru,
3713 that folc uuarð an forhtun | endi frâgodun sân,
3714 hue that uuâri, | that thar mid thiu uuerodu quam,
3715 mid theru mikilon menegi. | Thô sprak im ên man angegin,
3716 quað that thar Hiesu Crist | fan Galileo lande,
3717 fan Nazarethburg | neriand quâmi,
3718 uuitig uuârsago | themu uuerode te helpu.
3719 Thô uuas them liudiun, | the imu êr grame uuârun,
3720 unholde an hugi, | harm an môde,
3721 that imu thea liudi sô filu | lofsang uuarhtun,
3722 diurdun iro drohtin. | Thô gengun dolmôde,
3723 that sie uuið uualdand Crist | uuordun sprâkun,
3724 bâdun that he that gesîði | suîgon hêti,
3725 letti thea liudi, | that sie imu lof sô filu
3726 uuordun ni uuarhtin: | `it is thesumu uuerode lêð,' quâðun sie,
3727 `thesun burgliudiun.' | Thô sprak eft that barn godes:
3728 `ef gi sie amerriad,' quað he, | `that hêr ni môtin manno barn
3729 uualdandes craft | uuordun diurien,
3730 than sculun it hrôpen thoh | harde stênos
3731 for thesumu folcskepi, | felisos starka,
3732 êr than it eo belîb=e, | neb=o man is lof spreke
3733 uuîdo aftar thesaru uueroldi.' | Thô he an thene uuîh innen,
3734 geng an that godes hûs: | fand thar Iudeono filu,
3735 mislîke man, | manage atsamne,
3736 thea im thar côpstedi | gikoran habdun,
3737 mangodun im thar mid manages huî: | muniterias sâtun
3738 an themu uuîhe innan, | habdun iro uuesl gidago
3739 garu te geb=anne. | That uuas themu godes barne
3740 al an andun: | drêf sie ut thanen
3741 rûmo fan themu rakude, | quað that uuâri rehtara dâd,
3742 that thar te bedu fôrin | barn Israheles
3743 `endi an thesumu mînumu hûse | helpono biddean,
3744 that sia sigidrohtin | sundiono tuomie,
3745 than hêr theob=as an | thingstedi halden,
3746 thea faruuarhton uueros | uuehsal drîb=an,
3747 unreht ênfald. | Ne gi êniga êra ni uuitun
3748 theses godes hûses, | Iudeo liudi.'
3749 Sô rûmde he thô endi rekode, | rîki drohtin,
3750 that hêlaga hûs | endi an helpun uuas
3751 managumu mankunnie, | them the is mikilon craft
3752 ferrene gefrugnun | endi thar gifaran quâmun
3753 ob=ar langan uueg. | Uuarð thar lêf so manag,
3754 halt gihêlid | endi hâf sô same,
3755 blindun gibôtid. | Sô dede that barn godes
3756 uuilliendi themu uuerode, | huand al an is giuueldi stêd
3757 umbi thesaro liudio lîf | endi ôk umbi thit land sô same.
3758a
[Fitt 46] [Fitt index]