[Back to Fitt 59]

Fitt 60

5039 Be thiu nis mannes bâg | mikilun bitherb=i,
5040 hagustaldes hrôm: | ef imu thiu helpe godes
5041 gesuîkid thurh is sundeon, | than is imu sân aftar thiu
5042 breosthugi blôðora, | thoh he êr bihêt spreca,
5043 hrômie fan is hildi | endi fan is handcrafti,
5044 the man fan is megine. | That uuarð thar an themu mâreon skîn,
5045 thegno bezton, | thô imu is thiodanes gisuêk
5046 hêlag helpe. | Bethiu ni scoldi hrômien man
5047 te suîðo fan imu selb=on, | huand imu thar suîkid oft
5048 uuân endi uuilleo, | ef imu uualdand god,
5049 hêr heb=enkuning | herte ni sterkit.
5050 Than bêd allaro barno bezt, | bendi tholode
5051 thurh mancunni. | Huurb=un ina managa umbi
5052 ludeono liudi, | sprâcun gelp mikil,
5053 habdun ina te hosca, | thar he giheftid stôd,
5054 tholode mid gethuldiun, | sô huat sô imu thiu thiod deda,
5055 liudi lêðes. | Thô uuarð eft lioht cuman,
5056 morgan te mannun. | Manag samnoda
5057 heri Iudeono: | habdun im hugi uulb=o,
5058 inuuid an innan. | Uuarð thar êosago
5059 an morgantîd | manag gisamnod
5060 irri endi ênhard, | inuuideas gern,
5061 uurêðes uuillean. | Gengun im an uuarf samad
5062 rinkos an rûna, | bigunnun im râdan thô,
5063 huô sie geuuîsadin | mid uuârlôsun,
5064 mannun mêngeuuitun | an mahtigna Crist
5065 te giseggianne sundea | thurh is selb=es uuord,
5066 that sie ina than te uunderquâlu | uuêgean môstin,
5067 adêlien te dôd=e. | Sie ni mahtun an themu dage finden
5068 sô uurêð geuuitscepi, | that sie imu uuîti bethiu
5069 adêlien gidorstin | eftha dôð frummien,
5070 lîb=u bilôsien. | Thô quâmun thar at laztan ford=
5071 an thena uuarf uuero | uuârlôse man
5072 tuêne gangan | endi bigunnun im tellien an,
5073 quaðun that sie ina selb=on | seggian gihôrdin,
5074 that he mahti teuuerpen | thena uuîh godes,
5075 allaro hûso hôhost | endi thurh is handmegin,
5076 thurh is ênes craft | up arihtien
5077 an thriddion daga, | sô is elcor ni thorfti bethîhan man.
5078 He thagoda endi tholoda: | ni sprak imu io thiu thiod sô filu,
5079 thea liudi mid luginun, | that he it mid lêðun angegin
5080 uuordun uurâki. | Thô thar undar themu uuerode arês
5081 baluhugdig man, | biscop thero liudio,
5082 the furisto thes folkes | endi frâgode Krist
5083 iac ina be imu selb=on bisuôr | suîðon êðun,
5084 grôtte ina an godes namon | endi gerno bad,
5085 that he im that gisagdi, | ef he sunu uuâri
5086 thes libbiendies godes: ` | thes thit lioht gescôp,
5087 Krist cuning êuuig. | Uui ni mugun is antkiennien uuiht
5088 ne an thînun uuordun ni an thînun uuerkun.' | Thô sprak imu eft the uuâro angegin,
5089 the gôdo godes sunu: ` | thu quiðis it for thesun Iudeon nu,
5090 sôðlîco segis, | that ik it selb=o bium.
5091 Thes ni gilôb=iad mi these liudi: | | ni uuilliad mi forlâtan bethiu;
5092 ni sind im mîn uuord uuirðig. Nu seggiu ik iu te uuârun thoh,
5093 that gi noh sculun sittien gisehan | an the suîðaron half godes
5094 mârean mannes sunu, | an megincrafte
5095 thes alouualden fader, | endi thanan eft kuman
5096 an himiluuolcnun herod | endi allumu heliðo cunnie
5097 mid is uuordun adêlien, | al sô iro geuurhti sind.'
5098 Tho balg ina the biscop, | habde bittren hugi,
5099 uurêðida uuið themu uuorde | endi is giuuâdi slêt,
5100 brak for is breostun: | `nu ni thurb=un gi bîdan leng,' quað he,
5101 `thit uuerod geuuitscepies, | nu im sulic uuord farad,
5102 mênsprâca fan is mûðe. | That gihôrid hêr nu manno filu,
5103 rinko an thesumu rakude, | that he ina sô rîkean telit,
5104 gihid that he god sî. | Huat uuilliad gi Iudeon thes
5105 adêlien te dôme? | Is he dôðes nu
5106a uuirðig be sulicun uuordun?' |
[Fitt 61] [Fitt index]