[Back to Fitt 55]

Fitt 56

4628 Giuuêt imu thô ût thanen | inuuideas gern
4629 ludas gangan: | habde imu grimmen hugi
4630 thegan uuið is thiodan. | Uuas thô iu thiustri naht,
4631 suîðo gisuorken. | Sunu drohtines
4632 uuas ima at them gômun forð | endi is iungarun thar
4633 uualdand uuîn endi brôd | uuîhide bêðiu,
4634 hêlagode heb=encuning, | mid is handun brak,
4635 gaf it undar them is iungarun | endi gode thancode,
4636 sagde them ôlat, | the thar al giscôp,
4637 uuerold endi uunnea, | endi sprak uuord manag:
4638 `gilôb=iot gi thes liohto,' quað he, | `that thit is mîn lîchamo
4639 endi mîn blôd sô same: | gib=u ik iu hêr bêðiu samad
4640 etan endi drinkan. | Thit ik an erðu scal
4641 geb=an endi geotan | endi iu te godes rîkie
4642 lôsien mid mînu lîchamen | an lîf êuuig,
4643 an that himiles lioht. | Gihuggeat gi simlun,
4644 that gi thiu fulgangan, | thiu ik an thesun gômun dôn;
4645 mâriad thit for menegi: | thit is mahtig thing,
4646 mid thius sculun gi iuuuomu drohtine | diuriða frummien,
4647 habbiad thit mîn te gihugdiun, | hêlag biliði,
4648 that it eldibarn | aftar lêstien,
4649 uuaron an thesaru uueroldi, | that that uuitin alle,
4650 man ob=ar thesan middilgard, | that it is thurh mîna minnea giduan
4651 hêrron te huldi. | Gehuggiad gi simlun,
4652 hueo ik iu hêr gebiudu, | that gi iuuuan brôðerskepi
4653 fasto frummiad: | habbiad ferhtan hugi,
4654 minniod iu an iuuuomu môde, | that that manno barn
4655 ob=ar irminthiod | alle farstanden,
4656 that gi sind gegnungo | iungaron mîne.
4657 Ok scal ik iu cûðien, | huô hêr uuili craftag fîund,
4658 hetteand herugrim, | umbi iuuuan hugi niusien,
4659 Satanas selb=o: | he cumid iuuuaro seolono herod
4660 frôkno frêson. | Simlun gi fasto te gode
4661 berad iuuua breostgithâht: | ik scal an iuuuaru bedu standen,
4662 that iu ni mugi the mênscaðo | môd getuîflean;
4663 ik fullêstiu iu uuiðer themu fîunde. | Ok quam he herod giu frêson mîn,
4664 thoh imu is uuilleon hêr | uuiht ne gistôdi,
4665 liob=es an themu mînumu lîchamon. | Nu ni uuilliu ik iu leng helen,
4666 huat iu hêr nu sniumo scal | te sorgu gistanden:
4667 gi sculun mi gesuîkan, | gesîðos mîne,
4668 iuuues theganscepies, | êr than thius thiustrie naht
4669 liudi farlîða | endi eft lioht cume,
4670 morgan te mannun.' | Thô uuarð môd gumon
4671 suîðo gisuorken | endi sêr hugi,
4672 hriuuig umbi iro herte | endi iro hêrron uuord
4673 suîðo an sorgun. | Sîmon Petrus thô,
4674 thegan uuið is thiodan | thrîstuuordun sprac
4675 bi huldi uuið is hêrron: | `thoh thi all thit heliðo folc,' quathie,
4676 `gisuîcan thîna gisîðos, | thoh ik sinnon mid thi
4677 at allon tharab=on | tholoian uuilliu.
4678 Ik biun garo sinnon, | ef mi god lâtið,
4679 that ik an thînon fullêstie | fasto gistande;
4680 thoh sia thi an carcaries | clûstron hardo,
4681 thesa liudi bilûcan, | thoh ist mi luttil tueho,
4682 ne ik an them bendion mid thi | bîdan uuillie,
4683 liggian mid thi sô lieb=en; | ef sia thînes lîb=es than
4684 thuru eggia nîð | âhtian uuilliad,
4685 frô mîn thie guodo, | ik gib=u mîn ferah furi thik
4686 an uuâpno spil: | nis mi uuerð iouuiht
4687 te bimîðanne, | sô lango sô mi mîn uuarod
4688 hugi endi handcraft.' | Thuo sprak im eft is hêrro angegin:
4689 `huat, thu thik biuuânis,' quathie, | `uuissaro treuuono,
4690 thrîstero thingo: | thu hab=is thegnes hugi,
4691 uuillion guodan. | Ik mag thi seggian, huô it thoh giuuerðan scal,
4692 that thu uuirðis sô uuêkmuod, | thoh thu nu ni uuânies sô,
4693 that thu thînes thiadnes te naht | thrîuuo farlôgnis
4694 êr hanocradi | endi quiðis, thak ik thîn hêrro ni sî,
4695 ac thu farmanst mîna mundburd.' | Thuo sprac eft thie man angegin:
4696 `ef it gio an uueroldi,' quathie, | `giuuerðan muosti,
4697 that ik samad midi thi | sueltan muosti,
4698 dôian diurlîco, | than ne uuurði gio thie dag cuman,
4699 that ik thîn farlôgnidi, | lieb=o drohtin,
4700 gerno for theson Iuðeon.' | Thuo quâðun alla thia iungron sô,
4701 that sia thar an them thingon mid im | tholian uueldin.
[Fitt 57] [Fitt index]