[Back to Fitt 56]

Fitt 57

4702 Thuo im eft mid is uuordon gibôd | uualdand selb=o,
4703 hêr heb=ancuning, | that sia im ni lietin iro hugi tuîflian,
4704 hiet that sia ni uueldin... | diopa githâhti:
4705 `ne druob=ie iuuua herta | thuru iuuues drohtines uuord,
4706 ne forohteat te filo: | ic scal fader ûsan
4707 selb=an suokean | endi iu sendian scal
4708 fan heb=anrîkie | hêlagna gêst:
4709 thie scal iu eft gifruofrean | endi te frumu uuerðan,
4710 manon iu thero mahlo, | thie ik iu manag hebbiu
4711 uuordon giuuîsid. | Hie gib=it iu giuuit an briost,
4712 iustsama lêra, | that gi lêstian forð
4713 thiu uuord endi thiu uuerc, | thia ik iu an thesaro uueroldi gibôd.'
4714 Arês im thuo the rîkeo | an themo racode innan,
4715 neriendo Crist | endi giuuêt im nahtes thanan
4716 selb=o mid is gisîðon: | sêrago gengun
4717 suîðo gornondia | iungron Cristes,
4718 hriuuigmuoda. | Thuo hie im an thena hôhan giuuêt
4719 Oliuetiberg: | thar uuas hie up giuuno
4720 gangan mid is iungron. | That uuissa Iudas uuel,
4721 balohûgdig man, | huand hie uuas oft an them berege mid im.
4722 Thar gruotta thie godes suno | iûgron sîna:
4723 `gi sind nu sô druob=ia,' quathie, | `nu gi mînan dôð uuitun;
4724 nu gornonð gi endi griotand, | endi thesa Iuðeon sind an luston,
4725 mendit thius menigi, | sindun an iro muode frâha,
4726 thius uuerold ist an uuunnion. | Thes uuirðit thoh giuuand cuman
4727 sniumo tulgo: | than uuirðit im sêr hugi,
4728 than morniat sia an iro môde, | endi gi mendian sculun
4729 after te êuuondage, | huand gio endi ni cumið,
4730 iuuues uuellîb=es giuuand: | bethiu ne thurb=un iu thius uuerc tregan,
4731 hreuuan mîn hinfard, | huand thanan scal thiu helpa cuman
4732 gumono barnon.' | Thuo hiet hie is iungron thar
4733 bîdan uppan themo berge, | quað that hie ti bedu uueldi
4734 an thiu holmclib=u | hôhor stîgan;
4735 hiet thuo thria mid im | thegnos gangan,
4736 Iacobe endi Iohannese | endi thena guodan Petruse,
4737 thrîstmuodian thegan. | Thuo sia mid iro thiedne samad
4738 gerno gengun. | Thuo hiet sia thie godes suno
4739 an berge uppan | te bedu hnîgan,
4740 hiet sia god gruotian, | gerno biddian,
4741 that he im thero costondero | craft farstôdi,
4742 uurêðaro uuilleon, | that im the uuiðersaco,
4743 ni mahti the mênscaðo | môd gituîflean,
4744 iak imu thô selb=o gihnêg | sunu drohtines
4745 craftag an kniobeda, | kuningo rîkeost,
4746 forðuuard te foldu: | fader alothiado
4747 gôdan grôtte, | gornuuordun sprac
4748 hriuuiglîco: | uuas imu is hugi drôb=i,
4749 bi theru menniski | môd gihrôrid,
4750 is flêsk uuas an forhtun: | fellun imo trahni,
4751 drôp is diurlîc suêt, | al sô drôr kumid
4752 uuallan fan uundun. | Uuas an geuuinne thô
4753 an themu godes barne | the gêst endi the lîchamo:
4754 ôðar uuas fûsid | an forðuuegos,
4755 the gêst an godes rîki, | ôðar giâmar stôd,
4756 lîchamo Cristes: | ni uuelde thit lioht ageb=en,
4757 ac drôb=de for themu dôðe. | Simla he hreop te drohtine forð
4758 thiu mêr aftar thiu | mahtigna grôtte,
4759 hôhan himilfader, | hêlagna god,
4760 uualdand mid is uuordun: | `ef nu uuerðen ni mag,' quað he,
4761 `mankunni generid, | ne sî that ik mînan geb=e
4762 liob=an lîchamon | for liudio barn
4763 te uuêgeanne te uundrun, | it sî than thîn uuilleo sô,
4764 ik uuilliu is than gicoston: | ik nimu thene kelik an hand,
4765 drinku ina thi te diurðu, | drohtin frô mîn,
4766 mahtig mundboro. | Ni seh thu mînes hêr
4767 flêskes gifôries. | Ik fullon scal
4768 uuilleon thînen: | thu hab=es geuuald ob=ar al.'
4769 Giuuêt imu thô gangen, | thar he êr is iungaron lêt
4770 bîdan uppan themu berge; | fand sie that barn godes
4771 slâpen sorgandie: | uuas im sêr hugi,
4772 thes sie fan iro drohtine | dêlien scoldun.
4773 Sô sind that môdthraca | manno gehuilicumu,
4774 that he farlâten scal | liab=ane hêrron,
4775 afgeb=en thene sô gôdene. | Thô he te is iungarun sprak,
4776 uuahte sie uualdand | endi uuordun grôtte:
4777 `huî uuilliad gi sô slâpen?' quað he; | `ni mugun samad mid mi
4778 uuacon êne tîd? | Thiu uurd is at handun,
4779 that it sô gigangen scal, | sô it god fader
4780 gimarcode mahtig. | Mi nis an mînumu môde tueho:
4781 mîn gêst is garu | an godes uuillean,
4782 fûs te faranne: | mîn flêsk is an sorgun,
4783 letid mik mîn lîchamo: | lêð is imu suîðo
4784 uuîti te tholonne. | Ik thoh uuillean scal
4785 mînes fader gefrummien. | Hebbiad gi fasten hugi.'
4786 Giuuêt imu thô eft thanan | ôðersîðu
4787 an thene berg uppen | te bedu gangan,
4788 mâri drohtin, | endi thar sô manag gisprac
4789 gôdoro uuordo. | Godes engil quam
4790 hêlag fan himile, | is hugi fastnode,
4791 beldide te them bendiun. | He uuas an theru bedu simla
4792 forð an flîte | endi is fader grôtte,
4793 uualdand mid is uuordun: | `ef it nu uuesen ni mag,' quað he,
4794 `mâri drohtin, | neb=u ik for thit manno folc
4795 thiodquâle tholoie, | ik an thînan scal
4796 uuillean uuonian.' | Giuuêt imu thô eft thanen
4797 sôkean is gesîðos: | fand sie slâpandie,
4798 grôtte sie gâhun. | Geng imu eft thanen
4799 thriddeon sîðu te bedu | endi sprak thiodkuning
4800 al thiu selb=on uuord, | sunu drohtines,
4801 te themu alouualdon fader, | sô he êr dede,
4802 manode mahtigna | manno frumana
4803 suîðo niudlîco | neriando Crist,
4804 geng imu thô eft te them is iungarun, | grôtte sie sâno:
4805 `slâpad gi endi restiad,' quað he, | `Nu uuirðid sniumo herod
4806 cuman mid craftu, | the mi farcôpot hab=ad,
4807 sundea lôsan gisald.' | Gesîðos Cristes
4808 uuacodun thô aftar them uuordun | endi gisâhun thô that uuerod kuman
4809 an thene berg uppen | brahtmu thiu mikilon,
4810a uurêða uuâpanberand. |
[Fitt 58] [Fitt index]