[Back to Fitt 62]

Fitt 63

5245 Sô uurôgdun ina mid uuordun | uuerod Iudeono
5246 thurh hôtean hugi. | Thô the heritogo,
5247 slîðmôdig man | seggian gihôrde,
5248 fan huilicumu kunnie uuas | Krist afôdid,
5249 manno the bezto: | he uuas fan theru mârean thiadu,
5250 the gôdo fan Galilealande; | thar uuas gumscepi
5251 eðiliero manno; | Erodes biheld thar
5252 craftagne kuningdôm, | sô ina imu the kêsur fargaf,
5253 the rîkeo fan Rûmu, | that he thar rehto gehuilic
5254 gefrumidi undar themu folke | endi friðu lêsti,
5255 dômos adêldi. | He uuas ôk an themu dage selb=o
5256 an Hierusalem | mid is gumscepi,
5257 mid is uuerode at themu uuîhe: | sô uuas iro uuîse than,
5258 that sie thar thia hêlagun tîd | haldan scoldun,
5259 pascha Iudeono. | Pilatus gibôd thô,
5260 that thena hafton man | heliðos nâmin
5261 sô gibundanan, | that barn godes,
5262 hêt that sie ina Erodese, | erlos brâhtin
5263 haften te handun, | huand he fan is heriscepi uuas,
5264 fan is uuerodes geuuald. | Uuîgand frumidun
5265 iro hêrron uuord: | hêlagne Krist
5266 fôrdun an fiteriun | for thena folctogun,
5267 allaro barno bezt, | thero the io giboren uurði
5268 an liudio lioht; | an liðubendiun geng,
5269 antat sie ina brâhtun, | thar he an is benkia sat,
5270 cuning Erodes: | umbihuarf ina craft uuero,
5271 uulanke uuîgandos: | uuas im uuilleo mikil,
5272 that sie thar selb=on Crist | gisehan môstin:
5273 uuândun that he im sum têkan thar | tôgean scoldi,
5274 mâri endi mahtig, | sô he managun dede
5275 thurh is godcundi | Iudeo liudeon.
5276 Frâgoda ina thuo thie folccuning | firiuuitlîco
5277 managon uuordon, | uuolda is muodseb=on
5278 forð undarfindan, | huat hie te frumu mohti
5279 mannon gimarcon. | Than stuod mahtig Crist,
5280 thagoda endi tholoda: | ne uuolda them thiedcuninge,
5281 Erodese ne is erlon | antsuôr geb=an
5282 uuordo nigênon. | Than stuod thiu uurêða thiod,
5283 Iudeo liudi | endi thena godes suno
5284 uuurrun endi uuruogdun, | anthat im uuarð thie uueroldcuning
5285 an is huge huoti | endi all is heriscipi,
5286 farmuonstun ina an iro muode: | ne antkendun maht godes,
5287 himiliscan hêrron, | ac uuas im iro hugi thiustri,
5288 baluuues giblandan. | Barn drohtines
5289 iro uurêðun uuerc, | uuord endi dâdi
5290 thuru ômuodi | all githoloda,
5291 sô huat sô sia im tionono thuo | tuogian uuoldun.
5292 Sia hietun im thuo te hoske | huît giuuâdi
5293 umbi is liði leggian, | thiu mêr hie uurði them liudion thar,
5294 iungron te gamne. | Iudeon faganodun,
5295 thuo sia ina te hosce | hebbian gisâhun,
5296 erlos ob=armuoda. | Thuo senda ina eft thanan
5297 Erodes se cuning | an that ôðer folc;
5298 alêdian hiet ina lungra mann, | endi lastar sprâcun,
5299 felgidun im firinuuord, | thar hie an feteron geng
5300 bihlagan mid hoscu: | ni uuas im hugi tuîfli,
5301 neb=a hie it thuru ôdmuodi | all githoloda;
5302 ne uuelda iro ub=ilun uuord | iduglônon,
5303 hosc endi harmquidi. | Thuo brâhtun sia ina eft an that hûs innan,
5304 an thia palencea uppan, | thar Pilatus uuas
5305 an thero thingstedi. | Thegnos agâb=un
5306 barno that besta | banon te handon
5307 sundilôsian, | sô hie selb=o gicôs:
5308 uuelda manno barn | morðes atuomian,
5309 nerian af nôdi. | Stuodun nîðhuata,
5310 Iudeon far them gastselie: | habdun sia gramono barn,
5311 thia scola farscundid, | that sia ne bescrib=un iouuiht
5312 grimmera dâdio. | Thuo giuuêt im gangan tharod
5313 thegan kêsures | uuið thia thiod sprecan,
5314 hard heritogo: | `huat, gi mi thesan haftan mann,' quathie,
5315 `an thesan seli sendun | endi selb=on anbudun,
5316 that hie iuuues uuerodes sô filo | auuerdit habdi,
5317 farlêdid mid is lêron. | Nu ik mid theson liudon ni mag,
5318 findan mid thius folku, | that hie is ferahes sî
5319 furi thesaro scolu sculdig. | Scîn uuas that hiudu:
5320 Erodes mohta, | thie iuuuan êo bican,
5321 iuuuaro liudo landreht, | hie ni mahta is lîb=es gifrêson,
5322 that hie hier thuru êniga sundia te dage | sueltan scoldi,
5323 lîf farlâtan. | Nu uuilliu ik ina for theson liudion hier
5324 githrôon mid thingon, | thrîstion uuordun,
5325 buotian im is briosthugi, | lâtan ina brucan forð
5326 ferahes mid firion.' | Folc Iudeono
5327 hreopun thuo alla samad | hlûdero stemnu,
5328 hietun flîtlîco | ferahes âhtian
5329 Crist mid qualmu | endi an crûci slahan,
5330 uuêgian te uuundron: | `hie mid is uuordon hab=it
5331 dôðes gisculdid: | sagit that hie drohtin sî,
5332 gegnungo godes suno. | That hie ageldan scal,
5333 inuuidsprâca, | sô is an ûson êuue giscrib=an,
5334 that man sulica firinquidi | ferahu côpo.'
[Fitt 64] [Fitt index]